文/邵天骏
小辰光，屋里经济条件勿好，吃糖果辣平时也勿是想吃就能吃个。勿过一旦到了春节，屋里向备个年货里就会有各式各样个糖果。对我来讲，搿就是最开心个辰光了。
糖果吃脱以后，还有交关漂亮个糖果纸，我一般舍勿得厾脱，而是收集起来一张张整理得平平整整，再按照图案分类，夹到专门准备个记事簿里。一年又一年，就有了厚厚个几大本。
过年几天里随爷娘走访亲戚，除脱鸡鸭鱼肉，糖果招待也是免勿了嗰。糖果放进嘴巴里，甜蜜蜜香喷喷，味道邪气好，剥下来个糖果纸也成了我个“战利品”，我会小心翼翼摊平，再夹辣书本里带回去。其中有一种水果硬糖给我留下个印象最为深刻，不仅果香扑鼻，甜味浓郁，伊个糖纸图案也邪气好看。
勿知勿觉当中，我收藏个糖果纸既有长方形嗰，也有正方形嗰，还有圆形嗰，可谓多种多样，让其他小朋友邪气眼热。用现在个眼光来看，埃歇辰光个糖果纸设计多多少少侪有一眼“土”个味道，用个纸头还比较粗糙。但是对阿拉搿点小朋友来讲，糖纸上面个图案却是百看勿厌，再加上淡淡个糖果香气，自然而然就会萌生出交关喜欢个感觉。
时至今日，再次看到当年收藏个糖果纸，还是会勾起当年春节个美好记忆。同埃歇辰光相比，如今个糖果纸不仅纸张质地改进勿少，印刷个图案也更加精细繁复，但是总感觉缺少了埃歇辰光个意趣。或许是年龄勿一样，心情勿一样，当年看一眼就怦然心动个感觉再也寻不到了。
